نبی کریمﷺکی دعوت کی ایک انفرادی خصوصیت یہ بھی تھی کہ آپﷺ نے اپنے رفقاء کو بھی اس فریضے کی ادائیگی میں شامل کیا۔جو اہل ِسعادت آپﷺ پر ایمان لاتے، وہ مستقل مبلغ ہوتے۔ وہ اپنے آقا کی تعلیمات پھیلانےمیں عزیمت کا مظاہرہ کرتے تھے۔ چونکہ نبوت و وحی کا سلسلہ سرکارِ دوعالم پر بند ہو رہا تھا، لہٰذا امت کے سامنے سرکار ِدوعالمﷺ اور دعوت الی اللہ کے اصول کو منظم انداز میں بیان فرمایا گیا ہے۔دعوت و تبلیغ کے سلسلے میں حضور اقدس ﷺ کو جس ضابطے کا پابند کیا گیا، اس کا بیان سورۃ نحل میں ہے:
{ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُمْ بِالَّتِي هِيَ أَحْسَنُ}
[النحل: 125]
’’آپ اپنے رب کی راہ(یعنی دین ) کی طرف (لوگوں کو) علم کی باتوں کے ذریعے سے )جن سے مقصود ترغیب و ترہیب اور ترقیقِ قلب ہوتا ہے) بلائیے۔اور اگر بحث آن پڑے تو ان کے ساتھ اچھے طریقےسے (کہ جس میں شدت اور خشونت نہ ہو) بحث کیجیے‘‘۔(بیان القرآن)
دعوت و تبلیغ کے ان تین اصولوں کو حضورِ اکرمﷺ کی سیرت کے مختلف واقعات میں بہ آسانی دیکھا جا سکتا ہے۔ان اساسی اصولوں پر اٹھائیجانے والی دعوت کے اثرات کا اندازہ تیس سال کے مختصر عرصے میں تیار ہونے والی اطرافِ عالم کے باشندگان پر مشتمل صحابہ کرام رضی اللہ عنہم کی مقدس جماعت کی زندگیوں سے بخوبی ہو جاتا ہے۔دعوت و تبلیغ کے ان اصولوں کے ساتھ ساتھ قرآن کریم میں نبی کریمﷺ کو تلقین کردہ مزید اصولِ دعوتِ دین بھی ملتے ہیں۔جیسے نرم گفتاری(قوللَیِّن) شفقت(رِفْق) تدریج، تالیفِ قلوب، اعراض، تبشیر(خوش خبری دینا) تنذیر (ڈرانا)۔آئیے! نبی کریم ﷺ کی سیرت میں ان اصولوں کو دیکھتےہیں، تاکہ ان کے استعمال اور اثرات سے آگاہی ہو۔
حکمت یعنی دانائی ایک عطیۂ ربّانی ہے، جسے حکمت عطا کی گئی، اسے بڑی خیر دی گئی۔(قرآن)
حکمت آدمی کو موقع محل کی مناسبت سے درست فیصلے میں مدد دیتی ہے۔دعوت و تبلیغ میں حکمت کا تقاضا یہ ہے کہ آدمی دوسرے شخص کے مزاج، مزاق اور ماحول کو سامنے رکھتے ہوئے اس طرزِ تکلم کو اختیار کرے، جو اس کے لیے پُراثر اور دل نشین ہو۔اس کے ذہن سے آگے کی یا نچلی سطح کی باتیں حکمت کے خلاف ہیں۔جو دلائل مخاطَب کو قائل کر سکیں، حکمت سے ہی پیدا ہوتے ہیں۔حضرت عمران بن حصین رضی اللہ عنہ کے والد حضرت حصین رضی اللہ عنہ حضور اقدس ﷺ کی خدمت میں حاضرہوئے۔یہ وہ شخص تھے، جن کی قریش تعظیم کرتے تھے۔انہوں نے یہ کہہ کر حصین رضی اللہ عنہ کو بھیجا تھا کہ آپ اس آدمی (محمد ﷺ) سے بات کیجیے، جو ہمارے معبودوں کو بُرا بھلا کہتا ہے۔حصین رضی اللہ عنہ آپﷺ کی خدمت میں آئے تو آپﷺ نے ان سے پوچھا کہ تم کتنے معبودوں کی عبادت کرتےہو؟ حصین رضی اللہ عنہ بولے: سات آسمانوں میں اور ایک زمین میں۔آپﷺ نے فرمایا: جب تمہیں تکلیف پہنچے تو کس کو پکارتے ہو؟ بولے، آسمان والے کو۔آپﷺنے فرمایا: مال ہلاک ہو جائے تو کس کو پکارتے ہو؟ بولے: آسمان والے کو۔آپﷺنے فرمایا: یہ عجیب بات ہے کہ تمہاری بات پر وہ اکیلا فریاد رسی کرتا ہے اور تم اس کے ساتھ اَور خداؤں کو شریک کرتے ہو۔کیا تم آسمان والے خدا کی رضا و اجازت سے ان دیوتاؤں کو شریک کرتے ہو یا ان دیوتاؤں سے ڈرتے ہو کہ تم اگر ان کو شریک نہیں کرو گے تو وہ تم پر غالب آ جائیں گے۔حصین بولے: ان دو میں سے کوئی بات نہیں۔نبی کریمﷺ کی اس حکیمانہ دعوت کا اثر یہ ہوا کہ حصین رضی اللہ عنہ اس مجلس سے اسلام کی دعوت لے کر اٹھے۔(حیاة الصحابہ)
یعنی عمدہ نصیحت دعوت و تبلیغ کا دوسرا بنیادی اصول ہے۔داعی کو اپنی دعوت سمجھانے کے لیے مخلصانہ طور پر بات کرنی پڑتی ہے، جو دوسرے کے لیے دعوت کو پرکشش بنا دے۔اس ضمن میں نبی کریمﷺ کی سیرت میں وافر رہنمائی موجود ہے۔نبی کریمﷺ بے لوث ہو کر جو دعوت دیتے رہے، وہ بت پرستوں کے لیے اجنبی تھی، لیکن آپﷺ نے اپنی دعوت کو حسین اور خوب صورت انداز میں پیش کیا، جس نے دلوں کے اندر جگہ پکڑ لی۔ چنانچہ آپﷺ نے کہیں تو نفیس مثالیں دیں، کہیں ترغیب دی اور کہیں ترہیب( ڈرانے ) کا پہلو اختیار کیا۔آیاتِ قرآنیہ کی تلاوت اور خیرخواہی پر مبنی نصیحت نے لوگوں کو رسولِ پاکﷺ کی بات سننے اور ماننے پر آمادہ کر دیا۔اب سیرتِ طیبہ میں اس کی جھلکیاں ملاحظہ فرمائیں۔
ضمادازدی رضی اللہ عنہ اپنے قبولِ اسلام کا قصہ سناتے ہیں کہ میں عمرے کے لیے مکہ مکرمہ حاضر ہوا۔مجھے ایک مجلس میں بیٹھنے کا اتفاق ہوا، جس میں ابوجہل اپنے ساتھیوں سے کہہ رہا تھا کہ اس شخص نے ہماری جماعت میں تفرقہ پیدا کر دیا اور ہمیں بے وقوف قرار دیا۔ہمارے مردوں کو گمراہ کہا اور ہمارے معبودوں میں عیب نکالے۔اس پر امیّہ بن خلف نے کہا کہ یہ شخص یقینا پاگل ہے۔ضماد رضی اللہ عنہ کہتے ہیں کہ میں نے جی میں کہا کہ میں جنات کے اثرات کا علاج کرتا ہوں، لہٰذا اس شخص سے مل کر دیکھتا ہوں۔اس کے بعد میں نبی کریمﷺ کی تلاش میں رہا تو آپﷺ کو بیت اللہ میں نماز پڑھتے دیکھا۔میں آپﷺ کے قریب ہوا اور بتایا کہ میں نے آپ کی قوم کو آپ کے متعلق ایسی باتیں کہتے ہوئے سنا ہے، اگر آپ چاہیں تو میں آپ کا علاج کروں؟ نبی کریمﷺ نے اس کے جواب میں یہ کلمات فرمائے:
” الحمدللہ أحمدہ وأستعینہ وأومن بہ وأتوکل علیہ، من یھدہ اللہ فلا مضل لہ ومن یضللہ فلا ھادی لہ واشھد ان لَّا الہ الااللہُ وحدہ لاشریک لہ واشھد ان محمدًا عبدُہ ورسولُہ“۔
ترجمہ:’’سب تعریفیں اللہ کے لیے ہیں۔میں اس کی تعریف کرتا ہوں اور اسی سےمدد طلب کرتا ہوں، اسی پر ایمان لاتا ہوں اور اسی پر توکل کرتا ہوں۔جسے اللہ ہدایت دے، اسے کوئی گمراہ نہیں کرسکتا اور جسے وہ گمراہ کرے، اسے کوئی ہدایت دینے والا نہیں۔اور میں گواہی دیتا ہوں کہ اللہ کے سوا کوئی عبادت کے لائق نہیں ہے وہ اکیلا ہے، کوئی اس کا شریک نہیں۔اور میں گواہی دیتا ہوں کہ محمدﷺ اللہ کے رسول ہیں‘‘۔
ضماد رضی اللہ عنہ کہتے ہیں کہ میں نے اس سے بہتر کلام کبھی نہیں سنا تھا۔میں نے آپﷺ سے دوبارہ یہ کلمات پڑھنے کی درخواست کی تو آپﷺ نے اعادہ فرمایا۔میں نے پوچھا: آپ کس چیز کی طرف بلاتے ہیں؟ آپﷺ نے فرمایا کہ اس کی طرف کہ تم اللہ وحدہ لاشریک پر ایمان لاؤ اور بتوں کا پھندا پھینک دو اور میرے رسول ہونے کی گواہی دو۔ضماد کہتے ہیں: اگر میں ایسا کروں تو میرے لیے کیا ہے؟ آپﷺ نے فرمایا: جنت! چنانچہ ضماد نے اسلام قبو ل کر لیا۔(حیاۃ الصحابہ)
کبھی حکیمانہ دعوت اور اچھی نصیحت کے باوجود مخاطَب دعوت قبول کرنے میں پس و پیش کرتا ہے اور تنقید کا رویہ اختیار کرتا ہے۔اپنے نظریات کو درست سمجھتے ہوئے دوسرے سے بحث و مباحثہ اختیار کرتا ہے۔ایسے وقت جب مباحثہ ناگزیر ہو جا تاہے، تب دعوت کا تیسرا اصول رہنمائی کرتا ہے۔یعنی اس جدال و مباحثے میں بھی اخلاق کا پہلو ہاتھ سے نہیں چھوٹنا چاہیے۔ہدایت عطا کرنے والی اور دلوں کو پلٹنے والی ذات حق تعالٰی کی ہے۔لہٰذا زیادہ غم و غصے کی ضرورت نہیں۔اپنا کام تو منشائے خداوندی پورا کرنا ہے۔لہٰذا داعی اپنی ذمہ داری پوری کر کے نتیجہ اللہ تعالٰی شانہ پر چھوڑ دے۔بہرحال نبی کریمﷺ نے ”وجادلھمبالتیھیاحسن“پر کیسے عمل کیا، ملاحظہ ہو۔
عدیّ بن حاتم عرب کے معروف سخی حاتم طائی کے فرزند تھے اور نصرانی مذہب کے عالم تھے۔حضور اکرم ﷺ کی خدمت میں آئے تو آپﷺ نے فرمایا کہ اے عدی بن حاتم! تُو کس چیز سے فرار ہوتا ہے؟ کیا تو اس بات سے بھاگا کہ لاالہ کہنا پڑتا ہے؟ تو بتا کیا اللہ کے سوا کوئی عبادت کے لائق ہے؟ تو کس چیز سے بھاگا؟ کیا اس لیے بھاگاکہ اللہ اکبر کہا جائے گا؟ تو بتا کوئی چیز ایسی ہے، جو اللہ عز وجل سے بڑی ہے؟ عدی کہتےہیں؛ میں مسلمان ہو گیا۔میں نے دیکھا کہ رسول اللہ ﷺ کاچہرہ خوشی سے چمک رہا تھا۔پھر آپﷺ نے فرمایا: بے شک جن پر غضب ہوا، وہ یہودی ہیں اور جو گمراہ ہوئے وہ عیسائی ہیں۔
(مسند احمد 37، 4)
یعنی نرم گفتگو دعوت کی تاثیر اور کشش میں ریڑھ کی ہڈی کے مانند ہے۔خود مالکِ ارض و سماء نے اپنے پیغمبروں کو نرم گفتگو کی تلقین کی ہے۔موسی و ہارون علیہما السلام کو فرعون جیسے باغی اور دشمن کی طرف بھیجتے ہوئے فرمایا:’’فَقُولَا لَهُ قَوْلًا لَيِّنًا‘‘اس سے نرم بات کہنا۔اپنے حبیبﷺ کو نرم گفتگو اور خوش اخلاقی سے مزین فرمایا اور فرمایا کہ اگرآپ تندخو اور سخت طبیعت کے ہوتے تو لوگ آپ کے پاس سے منتشر ہو جاتے۔
(آل عمران، 159)
نبی کریم ﷺنے اپنے مخاطَبین سےنرم گفتگو کا رویہ ہی اختیار فرمایا۔حضرت انس رضی اللہ عنہ فرماتے ہیں کہ حضورﷺ بنونجار کے ایک آدمی کے پاس عیادت کے لیے تشریف لے گئے۔آپﷺ نے ان سے فرمایا: اے ماموں جان! آپ لاالہ الااللہ پڑھ لیں۔انہوں نے کہا: میں ماموں ہوں یا چچا؟ آپﷺنے فرمایا: آپ چچا نہیں ماموں ہیں۔(یعنی رشتے کے) لاالہ اللہ پڑھ لیں۔انہوں نے کہا کیا یہ میرے لیے بہتر ہے؟ آپﷺ نے فرمایا: ہاں! (مسند احمد)
حضرت انس رضی اللہ عنہ فرماتے ہیں: آپﷺ نے ایک آدمی سے فرمایا: مسلمان ہو جاؤ، سلامتی پا لو گے۔اس نے کہا: میرا دل نہیں چاہتا۔آپﷺ نے فرمایا: دل نہ چاہے، تب بھی (مسلمان ہو جاؤ)۔(مسند احمد)
حضرت ابوبکر صدیق رضی اللہ عنہ کے والد ابو قحافہ فتح مکہ کے موقع پر آپﷺ کی خدمت میں آئے تو آپﷺ نے ان کے دل پر ہاتھ رکھ کر فرمایا: مسلمان ہو جائیں، سلامتی پا لیں گے۔ چنانچہ ابو قحافہ مسلمان ہو گئے۔(ابن سعد 1/ 451)
عموماً انسانی طبائع کوکسی نئی چیز سے مانوس ہونے میں کچھ وقت لگتا ہے۔پھروہ نئی چیز اگر ایک ایسا نظامِ حیات اور فکروعمل کا مجموعہ ہو، جو سر سے پیر تک ظاہر و باطن کی تبدیلی چاہتا ہو۔ان روایت و اقدار سے یکسر مختلف ہو، جو نسلاًبعد نسٍل ٍمنتقل ہوتی ہوں تو اس سے انسیت بطریقِ اَولیٰ دیر طلب ہوگی۔ نبی کریمﷺ نے بت پرستی اور مادہ پرستی میں ڈوبے ہوؤں کے درمیان توحید کی دعوت دی تو لوگوں کا یہ بھی اعتراض تھا کہ ہمارے آباء نے اس عقیدے کے ساتھ زندگی نہیں گزاری۔کیا انہیں عقل نہیں تھی؟ پھر صرف عقیدے کی حد تک نہیں، بلکہ اسلام تو ظاہر و باطن سب کی تبدیلی کا طلب گار تھا۔بقول اقبال؎
یہ شہادت گہ الفت میں قدم رکھنا ہے
لوگ آساں سمجھتے ہیں مسلماں ہونا
ایسے وقت میں ایک صدیق اکبر رضی اللہ عنہ کا ہی حوصلہ تھا، جنہوں نے آپﷺ کی تصدیق و اعانت میں کوئی جھجک محسوس نہیں کی، لیکن عام طورپر لوگوں کو اجنبیت محسوس ہوئی۔اس صورتِ حال کو سامنے رکھ کر ہم دیکھیں تو معلوم ہوگا کہ اسلامی احکام کا نزول بتدریج ہوا۔ابتداء میں توحید و رسالت اور آخرت پر پختہ یقین بٹھایا گیا۔پھر مدنی زندگی میں جمعہ، روزہ، زکوٰۃ، پردہ، حج، جہاد اور حرمتِ شراب وغیرہ کے احکامات نازل ہوتے رہے۔نبی کریمﷺ نے اس اصولِ تدریج کو کیسے ملحوظ رکھا؟ ملاحظہ فرمائیں:
ابنِ عباس رضی اللہ عنہما فرماتے ہیں کہ آپﷺ نے حضرت معاذ رضی اللہ عنہ کو یمن روانہ فرماتے ہوئے وصیت کی کہ تم اہل کتاب پر جاؤ گے۔جب تم ان کے پاس پہنچو تواس بات کی دعوت دینا کہ اللہ تعالٰی کے سوا کوئی عبادت کے لائق نہیں اور محمد ﷺ اللہ کے رسول ہیں۔اگر وہ اس میں تیری اطاعت کریں تو انہیں خبر دینا کہ اللہ تعالٰی نے ہر دن رات میں ان پر پانچ نمازیں فرض کی ہیں۔اگر وہ یہ بھی مان جائیں تو انہیں بتانا کہ اللہ تعالٰی نے ان پرصدقہ(زکوۃ) فرض کیا ہے۔جوان کے مال داروں سے لیا جاتا ہے اور ان کے فقیروں پر لوٹایا جاتا ہے۔اگر وہ تیر ی بات مان لیں تو پھر ان کے بہترین مال لینے سے بچنا اور مظلوم کی بددعا سے بچنا۔کیونکہ اس کے اور اللہ کے درمیان کوئی پردہ نہیں۔
(البدایۃوالنھایۃ:116،5، داراحیاءالتراث)
عام مشاہدہ ہے کہ محبت آمیز رویہ اور مشفقانہ حسن ِسلوک بڑے سخت دلوں کو بھی پسیج دیتا ہے۔آدمی احسان کرنے والے کی بات سننے پر آمادہ ہو جاتا ہے۔اور مہربان کے لیے اس کی طبعی ضد و انا کم پڑجاتی ہے۔نبی کریم ﷺ تو دونوں جہانوں کے لیے رحمت تھے۔ مومنین کے لیے رؤف و رحیم او ر لوگوں کی ہدایت پرحریص تھے۔آپﷺ کی شفقت ومہربانی انسانوں سے آگے بڑھ کر جانوروں پر بھی سایہ فگن تھی۔اس شفقت و مہربانی نے بڑے سرکش دشمنانِ دین کو بھی اپنا رویہ تبدیل کرنے پر مجبور کر دیا۔بالآخر وہ اسلام کے جانثار سپاہی بن گئے۔بنوحنیف کے رئیس ثمامہ بن اثال قیدی بنا کر نبی کریم ﷺ کے خدمت میں لائے گئے۔یہ ثمامہ بڑے سخت دشمنِ اسلام تھے۔نبی کریم ﷺ نے ان پر اسلام پیش کیا تو ثمامہ نے قبول کرنے سے انکا ر کر دیا۔نبی کریم ﷺ نے حکم دیا کہ ثمامہ کو مسجدِ نبوی کے اندر ہی ایک ستون سے باندھ دیا جائے۔دوسرے دن نبی کریم ﷺ نے ثمامہ کو اپنے پاس طلب کیا او ر اسلام کے بارے میں رائے پوچھی۔ثمامہ نے کہا کہ اگر آپ مجھے چھوڑتے ہیں تو ایک کریم نفس کو چھوڑتے ہیں۔اگر مال چاہتے ہیں تو آپ کو مال دیا جائے گا اور اگر خون کرتے ہیں تو ایک ایسے شخص کا خون کریں گے، جس کے لیے بہت سا خون بہے گا۔نبی کریمﷺ نے حکم دیا کہ ثمامہ کو ستون سے باندھ دیا جائے۔تیسرے روز آپﷺ نے ثمامہ سے پھر ان کی رائے پوچھی تو ثمامہ نے وہی جواب دیا۔آپ نے حکم دیا کہ ثمامہ کو چھوڑ دیا جائے۔ثمامہ نے وہیں قریب میں جا کر غسل کیا او ر حاضر ِخدمت ہو کر عرض کیا کہ مجھے کلمہ پڑھایا جائے۔اس کے بعد ثمامہ کہنے لگے کہ مجھے پہلے آپ کے چہرے سے زیادہ مبغوض چہرہ کوئی نہیں تھا اور اب آپ کے چہرے سے زیادہ محبوب چہرہ کوئی نہیں۔ (ترمذی)
نبی کریم ﷺعقل و دانائی میں کامل تھے۔آپﷺنے انسانوں کی روحانی تربیت کے فرائض سرانجام دیتے ہوئے انسانی نفسیات کی بھی رعایت کی ہے۔بہت سے لوگ مسلمان ہوتے تو انہیں اپنی برادری کی دشمنی کا سامنا کرنا پڑتا۔بعض لوگ اپنی وجاہت کے ساتھ ساتھ مال کا بھی نقصان سہتے۔ایسے وقت میں جب ان لوگوں کے دلوں کو ڈھارس دینے کی ضرورت تھی اور انہیں اسلامی برادری میں ضم کرنا ضروری تھا، معلمِ انسانیت نے ان لوگوں کے لیے عطیات مقرر فرمائے، مالِ غنیمت میں ان لوگوں کے لیے خاص حصہ مقرر فرمایا۔اس کریمانہ سلوک نے ان نو مسلموں کے حوصلے بلند کیے اور جو لوگ قبولِ اسلام میں تردد کا شکار تھے، ان کے دل موہ لیے۔اگرچہ صفوان بن امیہ اس دن تک مسلمان نہیں ہوئے تھے، لیکن ہوازن کی جنگ میں شریک ہوئے۔جنگ میں مسلمانوں کو فتح ہوئی تو بہت سا مال ہاتھ لگا۔رسول اللہ ﷺ مال ِغنیمت دیکھ رہے تھے اور صفوان آپ کے ساتھ تھے۔
حضوراکرمﷺ نے حضرت معاذ رضی اللہ عنہ کو یمن روانہ کرتے ہوئے یہ اصول بھی تلقین فرمایا تھا کہ ”یسراولاتعسرابشراولاتنفرا“یعنی آسانی کرنا، تنگی نہ کرنا۔خوش خبری دینا اور متنفر نہ کرنا۔خود آپﷺ نے اپنی دعوت میں اللہ تعالٰی کی طرف سے ایمان اور اعمالِ صالحہ پر ملنے والے اجر و ثواب کو کھول کھول کر بیان فرمایا۔جنت اور اس کی نعمتوں کو بیان فرمایا۔جنت کی نعمتوں کو اس انداز سے بیان فرمایا کہ نہ کسی آنکھ نے انہیں دیکھا نہ کسی کان نے ان کی خوبیوں کو سنا اور نہ ہی کسی انسان کے دل میں ان بلند پایہ نعمتوں کا خیال گزرا۔
انسانی طبائع کا خاصہ ہے کہ نفع کی طرف مائل ہوتی ہیں۔آپ نے کسی کام کے لیے کسی کو تیار کرنا ہے تو آپ اس کام کے فائدے اسے بیان کر کے اس کے شوق کو مہمیز دیتے ہیں۔پھر مشکل سے مشکل کام انسانی ہمت کے سامنے دم توڑ دیتا ہے۔جنت کی طلب اور اس میں ملنے والی ابدی رضا و لقائے خداوندی کے لیے تو بس نفس کی مخالفت درکار ہے۔ آگے کے تمام مراحل طے ہوتے چلے جاتے ہیں۔آپﷺ نے اپنی دعوت میں تبشیر و ترغیب کے اصول کو قائم رکھا، جیسا کہ احادیث سے معلوم ہوتا ہے۔
بنی مالک بن کنانہ کے ایک آدمی کہتے ہیں کہ میں نے نبی کریمﷺ کو بازار ذوالمجاز کے وسط میں دیکھا تھا۔آپﷺ فرماتے تھے، لوگو! لاالہ الااللہ کہہ دو، کامیاب ہو جاؤ گے۔اس قسم کے دوسرے بہت سے واقعات موجود ہیں، جن میں آپﷺ نے تبشیروترغیب کے اصول کو مدنظر رکھا۔آپﷺ نے فرمایا کہ اللہ تعالٰی نے مجھے خوش خبری دینے والا اورڈرانے والا بنا کر بھیجا ہے۔اگر تم اس بات کو قبول کر لو، جو میں لے کر آیا ہو ں تو تمہارے لیے دنیا اور آخرت میں فائدہ ہے۔(ابن کثیر3/24)
کبھی طبیعت ایسی سخت ہو جاتی ہے کہ اس پر نرم بات کارگر نہیں ہوتی۔خوش خبری سنانے پر بجائے یہ کہ وہ مزید ہمت کے ساتھ عمل میں لگتے، الٹا ان کی جرأت اَور بڑھ جاتی ہے۔جب وہ سِرے سے توحیدورسالت کے ہی منکر ہوں تو دنیوی عیش و نشاط ہی کل کائنات معلوم ہوتے ہیں۔ان حالات میں نبی اور داعی انہیں دردناک عذاب کی خبرد یتے ہیں، تاکہ وہ بڑے نقصان سے بچ سکیں۔اس ڈراوے میں انہیں دنیوی تکالیف یاد دلا کر آخرت کی کئی گنا زائد تکلیفوں کی طرف متوجہ کیا جاتا ہے۔احادیث میں مختلف گناہوں کے نتائج کو بیان کیا گیا ہے۔ نبی کریمﷺ نے پوری خیر خواہی کے ساتھ امت کے سامنےکفر، شرک، حسد اور دیگر تمام گناہوں کے ہول ناک انجام کو اجمالاً یا تفصیلاً بیان فرمایا ہے۔
ابن عباس رضی اللہ عنہما فرماتے ہیں: جب اللہ تعالٰیٰ نے {وَأَنْذِرْ عَشِيرَتَكَ الْأَقْرَبِينَ}[الشعراء: 214]آیت نازل فرمائی تو آپ صفا پہاڑی پر گئے اور پکارا یاصباحاہ! (اے لوگو! دشمن صبح صبح حملہ کرنے والا ہے) سب آپ کے پاس جمع ہوگئے۔آپﷺ نے فرمایا: اے بنوعبدالمطلب! اے بنو فہر!اے بنو کعب! اگر میں تمہیں بتاؤ ں کہ اس پہاڑ کے دامن میں لشکر ہے، جو تم پر حملہ کرنا چاہتاہے۔کیا تم مجھے سچا مان لو گے؟ سب نے کہا: جی ہاں! آپﷺ نے فرمایا: میں تمہیں سخت عذاب کے آنے سے پہلے اس سے ڈرانے والا ہوں۔ابولہب بولا: تو برباد ہو جائے، ہمیں محض اسی لیے بلایا تھا؟ اس پر اللہ عز وجل نےسورۃ تبتیدانازل فرمائی۔(متفق علیہ، صحیح البخاری: 4971، صحیح مسلم:208 )